បទកុំបិទទូរស័ព្ទ ចេញលក់ថ្ងៃនេះក្នុងផលិតកម្មហង្សមាស CD Vol 464
ពិតជាភ្ញាក់ផ្អើលនិងរំភើបខ្លាំងណាស់ ជាមួយនឹងបទទាំង៧បទរបស់យក់ថិតរដ្ឋាដែលត្រៀមនឹងចេញលក់លើទីផ្សារឆាប់ៗនេះ (ទោះបីមិនដឹងថាពេលណាឲ្យច្បាស់ក៏ដោយ)។ យ៉ាងហោចណាស់ ត្រឹមតែឃ្លីបបទចម្រៀងខ្លីៗទាំង៧បទរបស់រដ្ឋាក្នុងវ៉ុលថ្មី HM CD 464 ក៏អាចធ្វើឲ្យយើងគ្រប់គ្នាសប្បាយចិត្តនិងអាចដឹងថាវាពិតជាពីរោះខ្លាំងណាស់។ វ៉ុល ៤៦៤ នេះពិតជាមិនធ្វើឲ្យអ្នកខកបំណងទេ ពេលនេះអ្នកគ្រាន់តែត្រៀមថវិកាសម្រាប់ជាវឌីសអូរីជីណល់ពេលចេញលក់ទៅគឺបានហើយ 
យ៉ាងណាមិញ វ៉ុលថ្មី ៤៦៤ របស់ផលិតកម្មហង្សមាសនេះ ជាវ៉ុលរដ្ឋាជាមួយអ្នកចម្រៀងប្រុសសំណៀងក្រអួនក្រអៅ ឆនសុវណ្ណារាជ។ ក្នុងបទទាំង១០ មានមួយបទដែលរដ្ឋាច្រៀងឆ្លើយឆ្លងជាមួយរាជ គឺបទ ស្នេហាគឺអាត្មានិយម។ ចំណងជើងទាំង១០ក្នុងវ៉ុលនេះ សុទ្ធសឹងតែប្លែកៗហើយមានអត្ថន័យផ្ដោះផ្ដងគ្នាទៅវិញទៅមក 
ខាងក្រោមនេះជាបញ្ជីបទទាំង១០ក្នុងវ៉ុលថ្មី ៤៦៤៖
០១. ផ្លូវស្នេហ៍បញ្ច្រាស់ទិស – យក់ ឋិតរដ្ឋា
០២. សញ្ញាខណ្ឌ – ឆន សុវណ្ណរាជ
០៣. ស្នេហាគឺអត្មានិយម – ឆន សុវណ្ណរាជ & យក់ ឋិតរដ្ឋា
០៤. កុំបិទទូរស័ព្ទ – យក់ ឋិតរដ្ឋា
០៥. ភ្លេចថាបែកគ្នា – យក់ ឋិតរដ្ឋា
០៦. ខូចចិត្តក្រោយគេ – ឆន សុវណ្ណរាជ
០៧. ខូចចិត្តមុនគេ – យក់ ឋិតរដ្ឋា
០៨. យូរៗទៅក៏ស្រឡាញ់អូន – ឆន សុវណ្ណរាជ
០៩. យូរណាស់ហើយបងនៅមិនទាន់ភ្លេចគេ – យក់ ឋិតរដ្ឋា
១០. ហេតុអ្វីបងមើលរំលងការឈឺចាប់អូន – យក់ ឋិតរដ្ឋា
បទថ្មីត្រៀមចេញលក់ក្នុងផលិតកម្មហង្សមាស ស៊ីឌី វ៉ុល ៤៦៣ មានចំណងជើងថា អ្នកស្រែស្រឡាញ់អ្នកស្រែដូចគ្នា ដែលជាបទតបទៅនឹងបទរបស់លោក ណុបប៉ាយ៉ារិទ្ធ។ បទនេះពីរោះណាស់ ខ្ញុំចូលចិត្ត ^^
បទថ្មីរបស់យក់ថិតរដ្ឋាដែលកំពុងត្រៀមលក់ក្នុងទីផ្សារក្នុងផលិតកម្មហង្សមាស វ៉ុល ៤៦៣ ដែលមានតារាចម្រៀងផ្សេងទៀត៥រូបដូចជា ឆនសុវណ្ណារាជ នៅស៊ីនឿន ឱកសុគន្ធកញ្ញា រិនសារ៉េត និង ពិនស្រីពេជ្រ។
ក្នុងវ៉ុល៤៦៣នេះដែរ រដ្ឋាមាន២បទ គឺបទ និស្សិតស្រី និងអ្នកស្រែស្រឡាញ់អ្នកស្រែដូចគ្នា។
ពេលនេះសូមរីករាយជាមួយបទ និស្សិតស្រី ដែលជាបទលន្លង់លន្លោចបែបអ្នកស្រុកស្រែ។ ពិតជាពិរោះ…
KhmerZoom.com >> 09th August 2012
កាល ពីរាត្រីយប់មិញ(៨ សីហា) តារាចម្រៀងហង្សមាស នាងយក់ ឋិតរដ្ឋា និងស្វាមី បានប្រារព្ធពិធីឡើងផ្ទះថ្មីយ៉ាងអធឹកអធមនៅម្ដុំសំណង់១២។ ប៉ុន្តែក្នុងពិធីដ៏ធំដុំនោះ បែរជាបាត់មុខអ្នកសារព័ត៌មានក្នុងរូបភាពគគ្រឹកគគ្រេងដូចពិធី ជប់លៀងរបស់តារាសិល្បៈទូទៅទៅវិញ ដោយសារតែនាងមិនបានអញ្ជើញ និងមានបំណងប្រារព្ធពិធីនោះដោយស្ងាត់កំបាំង ។
ពិធីឡើងផ្ទះថ្មីរបស់នាងយក់ ឋិតរដ្ឋា កាលពីរាត្រីយប់មិញ កាន់តែលើកមុខលើកមាត់របស់តារាហង្សមាសចំណូលថ្មីរូបនេះថែមមួយ កម្រិតទៀត បន្ទាប់ពីនាងស្រាប់តែហក់មកជិះRange Rover តម្លៃជាង៦ម៉ឺនដុល្លារ បន្ទាប់ពីមានវីឡាមួយកន្លែងតម្លៃរាប់សិបម៉ឺនដុល្លារ នៅក្នុងបុរីសាន់វ៉េ ម្ដុំទួលគោក។
អ្នកនាងអះអាងថា ផ្ទះវីឡានៅបុរីសាន់វ៉េនោះ គឺជាសំណង់ផ្ទះរបស់អ៊ុំ ដែលផ្ដល់ឲ្យនាងស្នាក់នៅបណ្ដោះអាសន្នប៉ុណ្ណោះ ចំណែកផ្ទះល្វែងដែលនាងបានធ្វើពិធីឡើងនៅយប់មិញនេះ ទើបជាកម្មសិទ្ធិផ្ទាល់ខ្លួន។ ម្នាក់ៗដែលបានឃើញផ្ទះរបស់នាង សុទ្ធតែសម្ដែងអារម្មណ៍ភ្ញាក់ផ្អើលមិនតិចឡើយ ដោយសារតែនៅក្នុងផ្ទះនោះ មានលម្អដោយដេគ័រយ៉ាងប្រណិត ដែលត្រូវគេអះអាងថា ជាស្នាដៃរបស់លោកឃុំ ប៉ុណ្ណាដែតដោយផ្ទាល់។ អ្នកនាងយក់ ឋិតរដ្ឋា បានថ្លែងប្រាប់ភ្ញៀវកិត្តិយសដែលចូលរួមនាយប់មិញថា សប្បាយចិត្តណាស់ ដែលនាងមានឱកាសបានរស់នៅផ្ទះថ្មី នៅប្លុកសំណង់១២ ក្រោមគំនិតកែច្នៃដោយផ្ទាល់របស់ស្វាមី។ អ្នកនាងមិនបញ្ជាក់ថា ផ្ទះនោះបានចំណាយប្រាក់អស់ប៉ុន្មានឲ្យពិតប្រាកដនោះទេ ប៉ុន្តែយោងតាមការព្រលយពីម្ចាស់ផ្ទះល្វែងជិតខាង អះអាងថា ផ្ទះនោះមានតម្លៃយ៉ាងហោច១៨ម៉ឺនដុល្លារ បើសរុបទាំងថ្លៃដេគ័រថែមថយផង។
ក្នុង ពិធីឡើងផ្ទះរបស់នាងយក់ ឋិតរដ្ឋា នោះ គេមិនឃើញវត្តមានរបស់តារាល្បីៗច្រើនកុះករប៉ុន្មានទេ ក្រៅពីក្រុមការងាររបស់ហង្សមាស និងតារាចម្រៀងរបស់ហង្សមាស។ អញ្ចឹងហើយ ទើបពិធីដ៏ធំដុំនោះ បែរជាគ្មានវត្តមានអ្នកកាសែតចូលរួម ដែលអាចថាមកពីគ្មានអ្នកដឹង និងអាចមកពីនាងមិនបានអញ្ជើញទាល់តែសោះ។ អ្នកលើកទូរស័ព្ទជំនួសនាងយក់ ឋិតរដ្ឋា និយាយថា ក្នុងចំណោមភ្ញៀវកិត្តិយសចូលរួមប្រមាណជាង៣០០នាក់កាលពីរាត្រី យប់មិញ ភាគច្រើន គឺជាអ្នកជំនួញ និងភ្ញៀវកិត្តិយស ចំណែកតារាសិល្បៈរួមមានតែនាងឱក សុគន្ធកញ្ញា លោកសូណូ លោកអាន គុណកូឡា លោកអ៊ីណូ និងតារាសិល្បៈល្បីឈ្មោះបួនដប់រូបទៀតតែប៉ុណ្ណោះ។
យក់ ឋិតរដ្ឋា ធ្លាប់ឲ្យដឹងថា ផ្ទះនៅសំណង់១២នោះ នាងបានទិញយូរហើយ គឺតាំងពីចេញគម្រោងបុកគ្រឹះថ្មីៗ ក្នុងអំឡុងឆ្នាំ២០១០ម្ល៉េះ ប៉ុន្តែមកពីការសាងសង់មានភាពយឺតយ៉ាវ ទើបឱកាសឡើងផ្ទះ ទើបតែអាចធ្វើឡើងកាលពីរាត្រីយប់មិញ (៨ សីហា) ។ នាងបានទិញពីរល្វែងជាប់គ្នាជាមួយបងប្អូន ដោយគ្រោងទម្លាយចូលគ្នា ធ្វើជាផ្សារទំនើប ប៉ុន្តែក្នុងពេលសន្ទុះក្នុងសិល្បៈរបស់នាង ស្រាប់តែមានទីផ្សារបែបនេះ នាងបានអះអាងថា រំសាយគម្រោងនោះចោលវិញហើយ។ ស្រដៀងនឹងការបញ្ជាក់មុនៗដែរ យក់ ឋិតរដ្ឋា អះអាងថា ផ្ទះនោះពិតជាមានតម្លៃជាង១០ម៉ឺនដុល្លារ ដោយគ្រាន់តែសំណង់ផ្ទះទទេ មិនទាន់បូកថ្លៃដេគ័រ ដ៏ទំនើបដែលនាង និងស្វាមីបានបំពាក់នៅក្នុងផ្ទះទាំងមូល ប៉ុន្តែមកពីនាងមានភាគហ៊ុនពិសេសក្នុងគម្រោងសាងសង់បុរីនោះ ទើបការទិញដូរ មានការបញ្ចុះតម្លៃយ៉ាងពិសេស ដែលមានកម្រិតចំណាយទិញក្នុងសន្ទស្សន៍ទាបជាងនេះ។ អញ្ចឹងហើយ ទើបនាងមិនចង់ធ្វើពិធីឡើងផ្ទះនោះ ឲ្យមានភាពភ្ញាក់ផ្អើល ក្នុងចង្កោមមហាជន ដោយមានវត្តមានអ្នកកាសែត។ តារាដែលមានឈ្មោះហៅក្រៅថា អាស្រស់រូបនេះនិយាយថា«ផ្ទះហ្នឹងពិតជាថ្លៃដល់១៨-១៩ម៉ឺន ដុល្លារមែន ប៉ុន្តែខ្ញុំ និងប្ដី ទិញក្នុងតម្លៃពិសេសទេ ព្រោះបងដែតមានភាគហ៊ុនជាមួយម្ចាស់បុរី ដោយសារតែគាត់ចេះខាងជំនាញដេគ័រ!»។ មហាជនជាច្រើន កោតសរសើរថា នាងពិតជាមានសំណាងមែន ដែលបានក្លាយជាតារាហង្សមាសហើយ ហើយថែមទាំងមានឱកាសឡើងសម្ពោធផ្ទះថ្មីមួយជុង ក្នុងតម្លៃរាប់ម៉ឺនដុល្លារនេះទៀត បើទោះជានាងមិនបានអញ្ជើញអ្នកកាសែត ដែលដូចគ្នានឹងការធ្វើឡើងដោយភាពស្ងាត់កំបាំងនោះក៏ដោយ៕
ដោយ៖ តារារដ្ឋ
ប្រភព៖ ខ្មែរហ្សួម
KhmerZoom.com >> 04th August 2012
បើទោះជា មុននេះ មានការអះអាងថា នាងយក់ ឋិតរដ្ឋា និងស្វាមី នៅមិនទាន់ចង់បានកូនថែមម្នាក់ទៀត ក៏ប្រភពចេញពីក្រុមគ្រួសាររបស់ពួកគេ បានអះអាងថាពួកគេមានការទទូចឲ្យអ្នកទាំងពីរយកកូនស្រីម្នាក់ ទៀតឲ្យបានឆាប់ ក្នុងឆ្នាំរោង ឬឆ្នាំម្សាញ់នេះ។ ប៉ុន្តែទំនងជាហេតុផលសិល្បៈ ទើបធ្វើឲ្យយក់ ឋិតរដ្ឋា និងស្វាមី បានសុំពន្យារចំពោះការទទូចនោះហើយ។
ក្ដីទន្ទឹងរបស់ក្រុមគ្រួសារទាំងសង ខាង ដែលចង់ឃើញលោកឃុំ ប៉ុណ្ណាដែត និងយក់ ឋិតរដ្ឋា មានកូនទី២ ដែលអាចជាកូនស្រីតែម្ដងនោះ នឹងមិនអាចធ្វើទៅរួចឡើយ ក្នុងពេលដែលនាងយក់ ឋិតរដ្ឋា ស្រាប់តែមានមុខឡើងសន្ទុះក្នុងពិភពចម្រៀង ហើយមិនព្រមដកដៃ បន្ទាប់ពីនាងមានឱកាសហក់ចូលក្នុងផលិតកម្មហង្សមាស។ លោកឃុំ ប៉ុណ្ណាដែត និយាយថា ឪពុកម្ដាយរបស់លោក និងភរិយា ពិតចង់ពរចៅម្នាក់ទៀត ដែលជាកូនទី២របស់លោកប្រាកដមែន ប៉ុន្តែមកពីលោកមិនចង់ឲ្យភរិយាខកបំណង ទើបទទូចសុំពួកគាត់ ឲ្យផ្អាកការទាមទានោះសិន។
ស្វាមី អ្នកនាងយក់ ឋិតរដ្ឋា និយាយថា «ចាស់ៗ ចង់បានលែងនិយាយហើយ ព្រោះគាត់ចង់ឲ្យពួកខ្ញុំមានកូនពីរបីសិនទាន់ខ្លួននៅក្មេង ប៉ុន្តែមកពីពួកខ្ញុំគិតរឿងហ្នឹងមិនទាន់គិតកើត ទើបមិនអាចទទួលយកការទទូចរបស់ពួកគាត់!»។ លោកអះអាងថា តាមមើលគម្រោងយកកូនទី២ អាចនឹងកើតឡើងយ៉ាងហោច២ឆ្នាំទៀតហើយឯណោះ ខណៈដែល២ឆ្នាំមុន លោកក៏បញ្ជាក់ដូចគ្នានេះដែរ ប៉ុន្តែនៅតែមិនកើតឡើង។ លោកនិយាយថា ទោះជាពេលនេះកូនប្រុសរបស់លោកមានវ័យជិត៥ឆ្នាំ (២៣ តុលា ឆ្នាំ២០០៧) ប៉ុន្តែនៅមិនទាន់ហួសពេលទេ បើ២ឆ្នាំ ទៀត ទើបពួកលោកមានកូនទី២ម្ដងទៀត។
ដូច គ្នានឹងការលើកឡើងនេះ នាងយក់ ឋិតរដ្ឋា បញ្ជាក់ថា អត់ទាន់ចង់បានកូនទេ ព្រោះខ្លាចពរពោះ ហើយឡើងគីឡូពិបាកសម្រកដូចមួយគ្រាមុន។ នាងនិយាយថា «រឿងកូនចៅធីបចោលសិនហើយ ព្រោះពរពោះម្ដងៗពិបាករឿងឡើងគីឡូណាស់ ម្យ៉ាងខ្ញុំចង់មូលនឹងសិល្បៈសិន ទើបមិនទាន់គិតរឿងហ្នឹង!»។ នាងអះអាងថា ខ្លួនក៏ចង់បានកូនស្រីឲ្យបានឆាប់ដែរ ប៉ុន្តែបើព្រោះតែបំណងនោះ ហើយរបូតឱកាសក្នុងពិភពចម្រៀង ដែលកំពុងតែហុចផ្លែផ្កា នោះនាងមិនធ្វើឡើយ។ ចំពោះក្ដីសង្ឃឹមនៅហង្សមាសវិញ បើទោះជានាងមិនច្បាស់ពីគោលការណ៍ថាអាចទទួលការផ្ចុងផ្ដើមបែប នេះបានយូរប៉ុណ្ណា តែនាងនៅតែរំពឹងថា ជម្រកចុងក្រោយមួយនេះ នឹងជួយឲ្យនាងសម្រេចបំណង។ នាងបញ្ជាក់ថា នឹងខិតខំដុសខាត់សមត្ថភាព ដូចជាការតុបតែងខ្លួនឲ្យបានស្រស់ស្អាត និងបញ្ចេញក្បាច់រាំឲ្យបានល្អ នៅពេលរូបនាងកាន់តែស្រកទម្ងន់បានមួយគ្រឺតទៀត បើទោះជាកន្លងមកមានអ្នករិះគន់ថា នាងធាត់ ស្លៀកពាក់មិនសូវទំនងជាតារាយុវវ័យ ធ្វើឲ្យនាងបាក់ទឹកចិត្តបន្តិក្ដី។ យក់ ឋិតរដ្ឋា និយាយថា ដរាបណា នាងនៅតែទទួលបានការជ្រោមជ្រែងពីហង្សមាស នោះនាងមិនទាន់រៀបគម្រោងយកកូនទី២ឡើយ ហើយនាងក៏មិនខ្លាចដែរ ចំពោះវត្តមានហក់ចូលរបស់នាងសុខ សីឡាលីន និងលាង សុផាឡែន ដែលទំនងថា នឹងធ្វើបទចម្រៀងល្អៗរបស់នាងនៅហង្សមាស មានការបែកខ្ញែក ពិបាកឲ្យនាងស្ទុះឡើងកូដជាងនេះ៕
ដោយ៖ តារារដ្ឋ
ប្រភព៖ ខ្មែរហ្សូម
Sabay.com >> 8th August 2012
បើទោះជាមើលមួយផ្នែកឃើញថា អ្នកនាង យក់ ថិតរដ្ឋា នៅផ្លូវម្ខាងម្នាក់ជាមួយស្វាមី លោក ឃុំ ប៉ុណ្ណាដែត ហើយមិនបានឡើងឆាកច្រៀងឆ្លងឆ្លើយដូចមុន ព្រោះតែងប់នឹងជំនួញក៏ដោយ តែថា អ្នកនាងនៅតែមានភាពកក់ក្ដៅគ្រប់គ្រាន់ហើយ នៅខាងក្រៅឆាកនោះ។
ក្រោយពីស្ងប់ស្ងាត់ពីសិល្បៈមួយរយៈ ដោយសាររវល់នៅក្នុងរូបភាពជាអ្នកម្ដាយទុកពេលវេលាថ្នាក់ថ្នមកូនដែលមិនអាចទុកចោលបាននោះ អ្នកនាង យក់ ថិតរដ្ឋា បានជ្រៀតចូលក្នុងផលិតកម្ម ហង្សមាស តែម្នាក់ឯង ទុកឲ្យអតីតដៃគូផ្អែមល្ហែមក្នុងបទចម្រៀង បច្ចុប្បន្នជាស្វាមីខ្លួន ឃុំ ប៉ុណ្ណាដែត តែលតោលម្នាក់ឯងក្រៅរង្វង់សិល្បៈ ព្រោះតែស្វាមីរបស់អ្នកនាងរូបនេះ បែរជាងាកទៅចាប់យកជំនួញជំនួសវិញ ក្នុងពេលដែលអាជីពសិល្បៈរបស់ពួកគេបានធ្លាក់ដុនដាបមួយខ្យល់នោះ។ អ្នកនាង យក់ ថិតរដ្ឋា ប្រាប់ថា នោះជាការព្រមព្រាងគ្នា ដោយមិនមាននរណាបង្ខំនរណាឡើយ ទើបក្រុមគ្រួសាររបស់អ្នកនាង អាចរស់ជុំគ្នាបានយ៉ាងមានសេចក្ដីសុខ។
បើនិយាយថា លោក ឃុំ ប៉ុណ្ណាដែត តែលតោលក្រៅរង្វង់សិល្បៈក៏ត្រូវ តែបើនិយាយថា យក់ ថិតរដ្ឋា តែលតោលខាងក្នុងសិល្បៈក៏ត្រូវ ខណៈក្នុងគ្រាកន្លងមកមុនពេលក្លាយជាស្វាមីភរិយានឹងគ្នា គេឃើញអ្នកទាំងពីររមែងជាគូចម្រៀងដ៏ស័ក្ដិសមមួយ។ ម្ល៉ោះហើយ ដល់ពេលឥឡូវម្នាក់ទៅឆ្វេង ម្នាក់ទៅស្ដាំដូច្នេះ ទស្សនិកជនយល់ថា ពួកគេជួបភាពហេងហាង ព្រោះបាត់ដៃគូ។ ប៉ុន្តែ អ្នកនាង យក់ ថិតរដ្ឋា ប្រាប់នៅក្រោយឆាក Shopping Show2012 កាលពីថ្ងៃអាទិត្យនៅផ្សារទំនើបសូរិយាកាលពីសប្ដាហ៍មុននោះថា នេះជារឿងធម្មតាទៅហើយ បើទោះជាពីមុនធ្លាប់មានស្វាមីច្រៀងជាមួយក៏ដោយ ប៉ុន្តែមិនមែនគ្រប់តែបទដែរ ។ ម្យ៉ាង បើទោះជាបច្ចុប្បន្នស្វាមីនាង មិនឡើងច្រៀងជាមួយលើឆាក ក៏គង់នឹងទៅតាមជាមួយរហូតដែរ។ ដូច្នេះហើយ អ្នកនាង មិនបានបាត់បង់ភាពកក់ក្ដៅនោះទេ។
លោក ឃុំ ប៉ុណ្ណាដែត កំពុងរវល់ជាប់ដៃជាមួយនឹងការងារលាក់មុខក្រៅសិល្បៈមួយ ដែលបើតាម អ្នកនាង យក់ ថិតរដ្ឋា ប្រាប់ថា ស្វាមីអ្នកនាង រវល់សឹងតែរកពេលញ៉ាំបាយជាមួយគ្នាមិនបានផង ។ តារាចម្រៀងសម្បុរខ្មៅស្រអែមញញឹមស្រស់រូបនេះ និយាយថា ” ការងារនោះជាចំណង់ចំណូលចិត្តរបស់គាត់ ដូច្នេះចំពោះសិល្បៈ គាត់ចង់ចូលវិញ ឬមិនចូលស្រេចតែគាត់ ខ្ញុំអត់មានបង្ខំទេ…តែគិតទៅៗ ម្យ៉ាងដែរ ខ្ញុំជាអ្នកចម្រៀង គាត់ធ្វើជំនួញ…អីចឹងចំណូលក៏កើនតាមហ្នឹងដែរ(សើច)…”។
ទោះយ៉ាងណាក៏ដោយ អ្នកនាង យក់ ថិតរដ្ឋា បញ្ជាក់ថា បើទោះជាពេលនេះ ស្វាមីអ្នកនាង កំពុងរវល់នឹងជំនួញខាងក្រៅ ក៏ពិតមែន តែមិនបានគិតថានឹងបោះបង់ចោលសិល្បៈរហូតដែរ គឺគ្រាន់តែផ្អាកមួយរយៈសិនប៉ុណ្ណោះ តែពេលណា ជំនួញរឹងដៃរឹងជើង ស្វាមីអ្នកនាង នឹងវិលមកសិល្បៈវិញហើយ។
អ្នកនាង យក់ ថិតរដ្ឋា បន្ថែមថា អ្នកនាងពិបាកប្រាប់ថា ការងាររបស់ស្វាមីនាងជាអ្វី ព្រោះអត់ទាន់មានក្រុមហ៊ុនអីច្បាស់លាស់នៅឡើយ ប៉ុន្តែស្វាមីរបស់នាងជាអ្នកឌីហ្សាញ រចនាម៉ូដផ្ទះ រចនាម៉ូដហាង ដោយមានកូនក្រុមមួយក្រុមតូច ទុកសម្រាប់លោកអ្នកគ្រប់គ្រងដែរ។
អ្នកនាង យក់ ថិតរដ្ឋា កំពុងបុកគ្រឹះរឹងមាំបន្តិចម្ដងៗនៅក្នុងទ្រនំថ្មីហង្សមាស បន្ទាប់ពីចេញពីផលិតកម្ម ប៊ិកមែន ដោយក្នុងនោះ ក្រុមហ៊ុនបាន និងកំពុងបន្តជ្រោមជ្រែងដោយផលិតបទថ្មីៗ ល្អៗឲ្យនាងឲ្យច្រៀង។ ដូច្នេះហើយ ទើបអ្នកនាងប្រាប់ថា អ្នកនាងកំពុងតែកក់ក្ដៅទាំងក្នុងការងារ និងសង្គមគ្រួសារ អត់មានអ្វីត្រូវបារម្ភឡើយ៕
អត្ថបទ៖ ឡាយ សុខអូន
កែសម្រួល៖ ទារិកា
ប្រភព៖ សប្បាយ
Everything about Yuk Thet Rotha is here!!! song lyrics + music video + mp3 + download link + photos + geography + news OF Yuk Thet Rotha~
